vol vewochting

62

“Is ‘t er bie uleu in de stroate a wat?” Mennig moal kreeg ik disse vroage.

De leu bedoel’n d’r met: Hef Cherry al ‘n klein vul e kreeg’n?

In ‘t decembernummer van Deeps Nieuws ha’k e skreeuw’n det Cherry, ‘t minipeerdje van Kim bie oons in de Roadhoesstroate, drachtig was.

“Nee,”mos ik dan kwiet. “Mar ‘t is t’r umme te doôn.”

No leu, zee vewocht’n ‘t in meert; ‘t zol wekk’n later word’n.

Oh ironie, met de planning zatt’n zee d’r kats noast.

Mear Kim had an ‘t tooval niks oaver e loat’n:

‘n Kroamkamer was t’r  kloar veur, ’n cameraatje op e hang’n, zodat zee ok thoes alles in de gaat’n kon hool’n, joa zelfs ’n stat van Cherry was in e vlocht’n met ’n klein löchke d’r in, zodat zee heur peerdje in ’t donker kon volgen en ne matrasse lag t’r in ‘t stalleke umme d’r ‘s nachens bie te könn’n wean.

Kon  neet misgoan, zoj zo denk’n???

Joawa! Op Könnigsdag, ‘s morns umme acht uur, kek buurvrouw Barbara boam oet ‘t raam en zag noast Cherry n’n miniscuul kopie loop’n, ma ginne Kim in de buurte. Den was t’r neet.

Wekk’nlang had zee heure telefoon umme de twee uur ‘s nachens loat’n ofgoan umme toch ma niks te miss’n van ‘t grote gebeur’n, mear op ‘t Moment Suprème was zee kats deur ‘t alarm hen e sloap’n.

Noe zoj denk’n dat oaverkump oe gin tweede keer? Ie road ‘t a! Joawa!

Want Cherry had ok nog ’n partner in de weide loop’n:  Raven!

Ok drachtig en umme de zelfde tied oet erekkend.

Bevrijdingsdag vief mei: Same place, same time, same person. Buurvrouw Barbara         kik wier oet ‘t raam en zut noast Raven ok n’n klein schepsel. Opniej ’n mooi vul.

En Kim? Joa, den mos wier e beld word’n.

Mooi spil det huppelend veergebeente.

 

Casper Bruinink