Den Surinaams’n sergeant basketballer oet Drenthe
Op dreëientwintig december van ’t veurige joar is Desi Bouterse oet de tied ekomm’n.
Vanoet zien schuuladres in de rimboe hebt zee ‘m netjes thoes of elèverd. In ne kiste of in n’n witt’n doôk met n’n strik terumme? Dat werre wie neet. Dut t’r veur mie ok neet toô!
“Lèverfaal’n,” zè ’n dokter. Neet vrömd, hee stun joa bekend um zien drankmisbroek.
Woarumme beginne ik feilijk oaver ‘m? Noe dat zit zo:
Bouterse was in 1968 vanoet Suriname in Nederland ekomm’n. Hee was vebeun’n as sergeant sportinstructeur an de Johannes Postkazerne in Havelte Drenthe.
Van april ‘73 tut en met april ‘74 lag ik doar as dienstplichtig militair en harre wie Desi dree keer n’n uur in de wekke met sport.
Hee was n’n best’n keerl, ma wa gedisciplineard.
Kan mie neet völle meer herinner’n van roem fieftig joar elene, ma een paar dinge wek nog goôd:
Wie moss’n oefen’ veur ’t militaire sportdiploma. Eén onderdeel was acht meter touwklimm’n met volledige bepakking. Dat kon ‘k neet veur mekaa krieg’n. Elke keer deed Desi mie de techniek veur. Noa ne recordpoging, veur mie, van hoogoet veer meter, zère met zien Surinaams’n accent: “Kom mar jange, loekt niet!”
Met de bössels van miene kamer ginge wie geerne noar discotheek Tarantula in Meppel. Op n’n keer trad doar Kaz Lux van Brainbox met ziene band op.
Den oamd was Desi met de basketbalkammeroa van Alcides Meppel doar ok.)
Hee kwam op n’n gegeem moment noar oons hen, sloôg mie op de rugge, woarop ’t bier oet mien glas klots’n en bie mien noast’n oaver ’t buis en de bokse vloag: “Ha jangens, joelie hier !” Ondertuske leep e deur noar n’n tap en haal’n mie een niej glas bier.
In 1974 zwaai’n ik of, Bouterse ’n joar later. Ik gunge ’t onderwies in, hee in 1975 met n’n onafhankelijkheid noar Suriname terugge en doar ’t leger in. In de joar’n dee volg’n gung ‘t mis. Wew allemoale.
“Spietig, dat sergeant, legerleider, couppleger, dictator, politicus en drugshandelaar Desi Bouterse aans ’n vekeerd’n ofslag hef enomm’n.”
Casper Bruinink