‘t Vochtige weer van de leste neeg’n moand hef t’r veur ezorgd daw zee oaveral zoog’n. Kroep’nd, hang’nd, glibber’nd, glie’nd, sliem’nd en veural vrett’nd. Alles ging d’r an.
Ik hebbe ‘t natuurlijk oaver gladjakkes dee oonze tuin’n en moestuin’n teisterd’n, terroriseerd’n en kats verruïneerd’n.
N’n Oaverriessels’n wienboer vewoord’n ‘t heel triest zó:
“Ik mor ‘t dit joar doon met de droem’ dee zee veur mie oaverloat.”
Vemakelijk von ik de oplössing’n dee de leu d’r opnoaheel’n um van dee kwelgeest’n oftekomm’n. Hier komt t’r ne pâ oet völle:
Deervrendelijk en milieubewust:
Iemand, den ‘k wa n’n betje kenne, had ans e lèz’n daj sinaasappel’n moss’n oet pess’n en de halve boll’n in ‘n tuin legg’n umme dee glibberjongs te lokk’n’. Zee kwamm’n, met tientall’n. Ma wa dooj d’r dan met? Dat ston néét in dat artikel. Dan mar in ‘n GFTbak. Nô, dat was lach’n. Zeej ‘t veur oe.
Eén ding: …..DÔ DAT NÓÓIT!!
Destructieve plann’n: (dee waar’n d’r ok)
Zo gung Herman van wieterop ‘s oams, noa ‘t ett’n, met ne schere noar boet’n en knipp’n zee mill’nduur. Zien buurman vroog of e wa good bie zien heufd was. “Zo maak ie d’r van ene tweeje!” zère.
Ne vrouwmenske met n’n groot’n moestuin word’n d’r helemoale krankjoarem van: “Ik goa met ‘n pot noar ‘n hof en streuje d’r zolt op. Dan broest zee zo lekker vot,” deed zee mie oet de deuke.
“good bedoelde” adviez’n?
- IVN röt oe an eggelhuuskes te koop’n. Eggels bunt gek op slakk’n. Leuk. Ma wer ie wa hoevölle eggelhuuskes Bruinink in zien tuin dan neudig hef? Nô, zo völle daj strukelt oaver dee stekkeldeers, want at zee oe veult ankomm’n kroept zee al in mekâ.
- “43 plant’n deej in ‘n tuin mót hebb’n woar de slakk’n oe neet ankomt,” las ik as tip onlanks in de krante. Te late, wieleu hadd’n 43 plant’n woar dee ondögde wal op ofkwamm’n.
Nô ja, kiek ok zelf ma waj d’r an doot…………….. ( of helemoale neet)
Casper Bruinink