De argernis van n’n vriewilliger

48

Vröwke V. was oet de tied ekomm’n.

De noast’n vedeeld’n ‘t spul van emotionele weerde.

Wat t’r oaverbleef was veur de Fancy Fair. N’n dochter, zonn’n teutebelle, was t’r bie umme de keerls an te wiez’n wat zéé  met mogg’n nemm’n.

Bened’n wor’n wat dinge oet e zog en op de wag’n e pakt.

“Völle is ’t neet. Uleu mot ’t t’r met doon,” zè de dochter, “ma boam hek ok nog wat!”

Ne smalle trappe leid’n de twee krasse knarr’n van de Fancy Fair noar hogere sfeer’n.

De maansleu wuss’n neet wat zéé zoog’n. 48 identieke verhuusdeuz’n met beuke, hon-der-den beuke. Dee moss’n noar beneed’n esjouwd wor’n. Goat t’r mar anstoan. 48!!! 24 de man. Smalle trappe of, smalle trappe wier op. En gauw 15 kilo de deuze.

N’n brökke till’n zéé zich. ‘t Was hun opedreag’n. Dus voer’n zéé ‘t oet. De beuk’nkemissie mos dan mar oetzeuk’n wat zéé gebroek’n konn’n. En de sjouwers? Zee moss’n mar zeen zoonder hernia d’r van of te komm’n. En de familie van vröwke V.? Dee war’n n’n pröttel mooi kwiet.

48 deuz’n wor’n op pallets eplaatst in de grote loodse op de boerderieje bie de krusing van Roadhoesstroate en Deepse Brook.

Daag’n later was ‘t de buurte an de beuk’nkeerls!

Noadat zee wat  hadd’n sillecteerd veur de verkoop in de manege, kwamm’n de deuzen van vröwke V. an de buurte.

De klepp’n worr’n lös emaakt en de beuke en tiedschrift’n bekekk’n van deuze ene. Zee harr’n ‘t a gauw ezene: Venameluk spul oaver spiritualiteit. Onvekoopbaar op de Fancy Fair. Volgende deuze. ‘t Zelfde verhaal. En zo ging ‘t nog 46 deuz’n vedan!!! Zovölle deuz’n met geestelijke inspiratie? De maansleu waand’n zich bekaant in ‘t nirwana. En 24 deuz’n van 15 kilo deur ‘n één en 24  deur n’n aander worr’n wier terugge op de pallets ezet….. veur?….De Harmonie!!!

Les wak bie Zielsjan en kreg’n wie ‘t oaver de 48 deuz’n, toen hee mie grijnz’nd zè:

“Da’s nog neet alles, d’r kump nog völle meer bie.”

Thoes ekomm’n hek a vaste met de fysio belt veur ne ofspraak binn’nkot.

Casper Bruinink